九點半起身，即刻搞煲蠔仔粥.....
材料有限，skip左少少步驟，
完成後都味道ok，但係落胡椒粉重手左d，都幾辣......
嗯，有少少失敗，最多都係60分........

Lucia打黎話今日老細話唔去Table Mountain，
臨時改左去佢屋企參觀同食lunch.......
難得咁好天氣都唔去.........

Caroline同Ryan準時十一點到，
俾左碗粥佢試，佢唔受辣，
要俾多杯水佢解辣.......

十二點幾Chad仲未出現，我sms俾佢，
佢又話黎唔到，佢再打黎我俾左Caroline聽.......
尋晚約佢今日十一點時，佢竟然問返我要去邊度？........
今次去Table Mountain，除左想Join Lucia之外，
主要因為Chad話未上過Table Mountain.......
算，佢真係無哂Credit~~~~~
ok，三個人都照上!!!!!

我地買完野，上黎坐多陣，一點半就出發上山~~~~
纜車站人龍唔多，但泊車就要好遠先有位~~~~
好快就上到纜車，Caroline全程都好緊張，
因為纜車內會360度自轉，企係窗邊都無得扶手~~~
十分鐘唔使就到山頂~~~~~

上次07年同Arthur上黎，當時十月初夏，
海洋冷暖氣流相撞關系，不斷有雲層從海邊山腰湧上山頂，
爬過山頂再飄落另一邊山，情況就好似打開一個好凍既冰格，
不斷有凍氣向下墜一樣.........雖然當時夏天，
但身處雲霧裡又濕又凍~~~~~

今次2nd round冬天上黎，又完全唔同感覺，風勢亦比想象中弱
仲見到d小動物，蜥蜴仔同Mongoose~~~~~
Mongoose應該係我地所講既黃鼠狼，不過呢隻係黑色既

行到好遠後坐低，開左支Sweet Red Wine一齊飲~~~~~
係山頂上飲紅酒，感覺好正~~~~~
期間撞到幾個香港永安團友，同佢地傾左陣~~~~
今日係佢地八日行程裡面既第二日，仲俾左份行程我睇添~~~

hea到五點，我地行返去纜車站睇日落，又影左好多相，
尾班車六點，我拖到前十分鐘先肯收手，
爭少少就影埋個咸蛋黃沉落海~~~~~
不過都已經好滿足囉~~~~~~

Caroline話聽日返工要多謝返Chad，
因為佢，我地先有咁㊣既一日，Beautiful Day!!!!!
佢唔黎真係o徒哂~~~~~~

返到黎食埋d粥，就開始執相，
部機影出黎既相，D黑點愈黎愈嚴重，
二百幾張，我執左兩個鐘先搞掂.........
我都係拎部機去公司附近既維修鋪check check先......
如果兩星期後真係去得成safari既話，
一定會影超多相........唔整到時實執餐死..........

追返兩日既日記，迷下迷下兩點後先訓.......

太早訓，太早就起身......八點幾......
搵到Lucia，但佢都唔清楚聽日既行程，
佢今晚會有party，會問下老細先再覆我，
嗯，不論佢地到唔到，我地都會照去~~~~~

打打機磨下時間，食過lunch就出街行下，
突然想剪髮，返左公司附近間salon，
有幾個客，我坐左陣有人埋黎就同我講，
晏少少先得閒，問我四點得唔得？
嗯，ok啦，仲有兩個鐘，我返公司一轉先

返到去Murray係度執野，我睇左陣3ds Max，
三點Murray走左，我就拎返個火焰effect出黎玩，
攤左好耐，今日終於完成......效果好似麻麻......
不過都upload左上sina做heading~~~~~

四點返去salon，又係咁多人，
我坐到四點半起身走人........都唔知仲要等幾耐......
好憎要等剪髮~~~~~~~
book左都要等，book黎做咩？
趁五點前超市未收鋪，返去買野好過~~~~

買左好多料，可選擇做炒飯或煲粥........
最後都係煲粥先，想試下煲蠔仔粥，
上網搵食譜跟住做，不過今晚只係準備定先，
聽朝早d起身先搞.........

訓前Lucia都未有聯絡，
就照原定計劃十一點呢度集合先~~~~

用半日紏纏於Bright Start，
仍然為唔夠high res. 相而苦惱中........
其餘時間就係將相變 line art........
做到收工，又出現過度集中後遣症....頭赤赤~~~~

中午send左Caroline幫手搵，
Lucia所需要既資料，再同佢傾左兩句，
佢呢個weekend會去Roben Island & Table Mountain，
Chad之前話未去過Table Mountain，
而Caroline至少十幾年無去過...........
所以我地就決定星期日Join埋Lucia上山，
不過要等Lucia覆返得唔得，
因為唔知公司點安排，推到就我地去接佢地，
唔係就山上等亦得~~~~~~

下晝四點全公司過左Pasta Factory開group meeting，
開會為名，實則係最後同Murray 最後farewell~~~~~
Murray聽日就飛去Belgium~~~~~~
食左四件pizza，我已經飽哂，但Chad食左幾件pizza之餘，
仲叫多碟意粉食.........佢d食量好驚人.......
唔怪得佢係公司，每次食完野個零鐘後又嗌肚餓.......

六點半先返到屋企，唔使煮野食~~~
可能又有d頭赤，坐左一陣就攤上床抖，
結果，未夠八點我已經訓著左........
十二點醒左，熄燈熄電視熄電腦後再訓過~~~~~
唔知幾耐未試過咁早訓........仲要係weekend........

十一點返左屋企一陣，
因為有人要睇樓，走時拎埋部相機，
係樓下沿著Gardens周圍影相，
影左廿零張就返公司，
d相做黎mockup用~~~~~

Chad話想發大TractorCreative黎搞，
我唔多讚成，因為未係時候，依家只得兩個人，
而且，TractorCreative所做既野，
暫時對我地黎講只係附屬品，
我地主力始終係做公司內部野..........
而且，我擔心係再加大工作量，
Chad係咪受得住先？

收工前Ryan黎埋接Caroline同我去Canal Walk，
去到商場join埋Lucia & 佢同學仔Katie，
行左陣我就帶佢地去Ocean Basket食飯，
叫左個最大份量既海鮮拼盤，都只係三百幾....好抵食!!!


我帶Caroline黎真係無錯，佢把口唔停又幫到佢地好多野，
遲d可能再約佢地去safari，Caroline應承會帶我地去~~~~
good，我都好想睇多次野生動物~~~~~

Lucia講返尋日，同老細講今晚唔使搵人陪佢地，
因為佢話Cape Town有個Uncle係度住，
今晚會同Uncle食飯.........聽到後我呢個Uncle O哂咀......
Uncle.......聽慣叔叔或舅父，Uncle反而感覺仲要老多D.......

散左後，Ryan私底下問我：are you like the little one(Lucia)?
下？我問點解咁問？佢話因為見我食飯時唔肯食煙喎........
我笑完後我解釋返，我一直都唔想同唔食煙既人同檯食煙，
唔好誤會我話你地有錯，呢個只係我個人其中一個原則~~~~
而仲有一個重點係：佢識我家姐.......
以免多個香爐多隻鬼，而且我又唔係大癮~~~~
之後Caroline知道呢個誤會後，因為佢都好清楚我呢樣野，
所以佢形容我係Old School Gentleman.........
又係Old.........

返到屋企Lucia send sms say thank you，
話今晚佢地過得好開心好舒服.......舒服？
可能佢黎左幾日，都仲好緊張下.........
諗返佢地講有咩擔心就知~~~~~~

尋晚既暴風延續到今日，
公司窗外都吹到彭彭聲，
連office內既board都震跌.......

今日幫Bright Start做Logo pics，
但Sally 遲遲都提供唔到high res. 既相......
仲話星期五想做好埋班細路既profile，
但我地追左幾次都未有資料同相俾我地.......
搞到Chad有d勞氣~~~~~~
但又無哂辦法，因為Sally係Adam老婆..........

同Caroline傾好，星期四晚去Canal Walk搵Lucia食飯，
原本佢想下星期先，因為下星期先出糧，
但我話妳車得我去，當然請埋妳兩公婆食飯啦~~~~~

收工前收到Brazil既email，係我同Chad之間，
揀左我既其中一款design~~~~
good!!! 又勝一仗~~~~~
聽朝再修改一下先

夜晚終於聯絡到Lucia，
聽日收工後出發再聯絡佢地~~~~

入夜十二點後，生命又再受到威脅.........
而且仲比尋晚更恐怖.........
好幾次俾強風既巨響嚇親..........
我唔驚俾玻璃插死，係驚夜媽媽吹爆隻窗點算好？
心寒到兩點先去訓..........

暫時放下Brazil 既Logo design，
send左俾個客睇下反應先~~~~~
下晝接手公司folder design，
呢類尺寸die cut野我可算好有經驗，
以前係上環真係做唔少呢類工作。
意料之外上網搵到下年月曆既vector file，
唔使自己砌餐死~~~~~
加入個folder裡面之餘，亦都可以自己用

阿邪要唔要下年月曆呀？
A4或wallpaper都無問題~~~~~

彭小姐見我無乜update，就睇穿我心情唔好........
叫我早d訓，夜訓d負能量會自我膨脹......

嗯，應該天氣影響掛，唔係落雨就天陰陰~~~~
今晚仲要俾暴風襲擊，全晚隻窗響過不停.........
而且仲要加埋類似窗框既爆裂聲.........
又要抱住(今晚唔知聽朝事)既心態上床訓.......

工作繼續清閒，做多一兩款logo layout.......

send左個sms俾Lucia，中午覆返我.......
今日已經係返左公司，
仲話之前已經去左Cape Point，睇左企鵝、
仲去埋Waterfront........
好奇怪，佢應該尋日先到，竟然可以去左咁多地方？
淨係Cape Point已經可以用一日時間啦........

收工時出左公司門口，Lucia打電話俾我，
原來佢星期六已經到Cape Town，
所以尋日公司有人帶佢地去玩~~~~~
過幾日約佢係Canal Walk食餐飯，
呢個星期天氣都唔會好......戶外既睇定d先~~~~

夜晚七八點Bonnie搵我，
話呢排返緊Parttime好辛苦，之前d時間掉轉哂......
適應唔返正常時間，返工恰眼訓，夜晚又訓唔著......
同我講依家都好眼訓，但又唔願訓喎........
仲想上網玩多陣先.........
話如果一陣無反應即係爬左係檯度訓著左......
我真係無野好講，佢真係比我更加痴線.........

好充足既睡眠，所以十點就醒左.......
天氣又係陰陰沉沉........
今日應該係Lucia到Cape Town，
阿信都問我Miss到左未？
佢仲有中英評分試未考，不過係唔計分既，
所以可以話已經考好試.........
阿信想睇[變型金鋼2]同[康州驅魔實錄]......
但後者二姐一定唔會陪阿信去睇.........
咦，可以叫彭生帶佢睇啦，彭生可能有興趣~~~~

露比打黎傾左陣，講下屋企近況~~~
話阿媽對眼可以遲d先做手術，
阿媽不知幾開心.......老人家真係好驚做手術~~~~
不過只係遲d，到最後始終都要做........
而二哥有可能十一月去鹿兒島工作........
去得成既話，各方面黎講都絕對係好事~~~~~
至少，可以修心養性一下......

仲有幾日我張香港電話咭就到期，
過左期我用左好多年既電話號碼就會保唔住，
但露比仲未幫我增值........
千叮萬囑叫佢唔好最後一日先搞，
萬一唔記得就無仇報........

到夜晚Lucia都無聯絡我，可能未收到張電話咭掛，
是但啦，聽日先試下打俾佢~~~~~~

呢期一到夜晚就無乜mood寫野.......

晏左起身.......十點半先醒
一起身即刻搞搞煲粥，烚埋d肉放入去，
分開兩個煲載，洗乾淨個大煲，
即刻再煲 [枇杷潤肺湯].....果陣已經十一點半後，
即刻沖返個涼先~~~~
未沖完電話響，miss call 無耐再有拍門聲......
彭彭聲著好衫開門，係Caroline兩公婆~~~真係準時
佢地無去銀行，因為佢地都唔知醒~~~~
買左半打啤酒上黎~~~
一邊飲啤酒一邊食粥......唔知會唔會搞肚痛呢？

我落街搵蔥買前，彭小姐msn搵我，
Caroline就同佢傾左陣~~~~
彭小姐仲以為我金屋藏嬌......

兩點前煲湯飲得，今次感覺唔太多，
可能太多湯渣，枇杷花亦都唔多好味，
不過d湯都幾清甜好飲~~~~~

佢兩公婆留到四點就走，
但Chad話黎始終都係無哂影........
每逢有關weekend既約定，信一半都俾多佢........

六點前miss左彭小姐個message，打俾佢但唔通......
差唔多一個鐘後佢又online，叫我再打俾佢，
之後就攤係床傾左半粒鐘，傾到無分鐘先收線

夜晚食埋d粥，打陣機，凍凍地上床攤左陣，
就咁圓寂左.........六點醒左起身熄燈再訓~~~~~~

好悠，真係好悠........
做完兩個Puma Mockups後已經無咩做，
上網搵fonts俾logo design用......

Chad話遲d去Cape Point，問我有無興趣？
好呀，我話可以帶埋Lucia去~~~~
之前Caroline都已經話可以帶我地去Cape Point，
或者其他地方，最多到時我出油錢啦~~~~~

愈無野做，就愈無精神........
三點零四點做到恰著咁劑.........

Caroline話聽朝去bank問下點買飛，
我話如果過黎我樓下既話，我會煲定粥同湯，
佢話咁就一定會黎，Chad聽到都話要湊熱鬧.......
不過佢既話.......聽住先啦~~~~~~

今晚食完野就要準備定聽日既野，
好彩仲有個電飯煲可以煲粥，
唔係就唔夠架生煲兩樣野..........